Ezr 1 | NdeIBE | STEP | Kwathi ngomnyaka wokuqala kaKhurosi inkosi yasePhesiya, ukuze kugcwaliseke ilizwi likaJehova elakhulunywa nguJeremiya, uJehova wathinta inhliziyo kaKhurosi inkosi yasePhesiya ukuba yenze isimemezelo kuwo wonke umbuso wayo, ukuthi sibhalwe phansi kuthiwe:

Ezra 1

UKhurosi Ubuyisela Izithunjwa

1 Kwathi ngomnyaka wokuqala kaKhurosi inkosi yasePhesiya, ukuze kugcwaliseke ilizwi likaJehova elakhulunywa nguJeremiya, uJehova wathinta inhliziyo kaKhurosi inkosi yasePhesiya ukuba yenze isimemezelo kuwo wonke umbuso wayo, ukuthi sibhalwe phansi kuthiwe:

2 “Nanku okutshiwo yinkosi uKhurosi wasePhesiya: “ ‘UJehova, uNkulunkulu wasezulwini, ungiphile yonke imibuso yasemhlabeni njalo ungikhethile ukuthi ngimakhele ithempeli eJerusalema koJuda. 3 Loba ngubani wabantu bakhe phakathi kwenu – sengathi uNkulunkulu wakhe angaba laye – kahambe aye eJerusalema koJuda ayokwakha ithempeli likaJehova, uNkulunkulu ka-Israyeli, uNkulunkulu oseJerusalema.

4 Akuthi abantu loba ngabakuyiphi indawo lapho okungabe kuseselensalela kabamuphe isiliva legolide, izimpahla lezifuyo, leminikelo yokuzizwela kusiwe ethempelini likaNkulunkulu eJerusalema.’ ”

5 Kwasekusithi abayizinhloko zemizi yakoJuda lakoBhenjamini, kanye labaphristi labaLevi – loba ngubani uNkulunkulu ayethinte inhliziyo yakhe – bazilungisela ukuhamba bayokwakha indlu kaJehova eJerusalema.

6 Bonke omakhelwane babo babancedisa ukuzuza izinto zesiliva legolide, izimpahla lezifuyo, lezipho eziligugu phezu kwayo yonke iminikelo yokuzizwela. 7 Phezu kwalokho iNkosi uKhurosi yakhupha zonke izinto ezazingezethempeli likaJehova ezazithunjwe nguNebhukadinezari eJerusalema wayazibeka ethempelini likaNkulunkulu wakhe. 8 UKhurosi inkosi yasePhesiya wathi kazilethwe nguMithiredathi umgcinisikhwama onguye owazibalayo ezibalela uSheshibhazari inkosana yakoJuda.

9 Nanzi-ke lezozimpahla: imiganu yegolide 30 imiganu yesiliva 1,000 amapane esiliva 29

10 imiganu yegolide ezingubhe 30 eyesiliva efana layo 410 ezinye izimpahla 1,000

11 Sekukonke, kwakuyi 5,400 zezinto zegolide lesiliva. USheshibhazari weza lazo zonke lezizinto lapho izithunjwa zafika eJurusalema zivela eBhabhiloni.